Dokumentalaren eta bideoartearen erdibidean dagoen lan hau hirurogei urtetik gorako zortzi emakumeren ahotsek gidaturiko sinfonia bisual bat da. Guztien artean, beren gorputzen, edertasunaren, sexualitatearen eta zahartzaroaren kontzepzioari buruzko hausnarketa bat aurkeztuko digute. Adineko pertsonak ikusezin bihurtzen dituen sistema batean bizi gara. Emakumeen kasuan, estigma hori larriagotu egiten da patriarkatuak gure bizitzan zehar ezartzen dituen aurreiritziengatik, araudi sozialengatik eta edertasun-kanonengatik. Emakumeen gorputzak haien ugaltzeko gaitasunagatik, gaztetasunagatik eta erakargarri sexualagatik baino balioesten ez dituen gizarte batean, [B]ELLAS emakumeek zahartzeko duten eskubidea eta gorputz guztien edertasuna aldarrikatzeko borondatetik sortutako proiektua da. Zentzumenen bidaia intersekzional baten bidez, [B]ELLAS lanak aurre egiten dio adineko emakumeak izaki adeitsu, ahul eta mendekotzat jotzen dituen estereotipoari. Horretarako, haien esperientziak, gorputzak, gaitasunak, zimurrak eta edertasuna aldarrikatuko ditu.