1979an, Three Mile Island-en (Harrisburg, AEB) izandako istripu nuklearraren ondoren, nazioarteko mugimendu antinuklearrak hainbat mobilizazio deitu zituen Ingurumenaren Nazioarteko Egunaren kariaz, ekainaren 3an. Euskal Herrian, aldarrikapen-festa bat egitea erabaki zen, Tuteran. Izan ere, euskal kostaldean programatutako hiru zentral nuklearrez gain (Lemoiz, Ea-Ispaster eta Deba), Arguedasen ere ─Tutera ondoan─ zentral nuklear bat eraikitzeko proiektua zegoen. Bardeako tiro-poligonoa ixtea eskatzeko ere baliatu zen mobilizazioa.