Bideak dokumentala artzain baten jatorritik sortu da. Motxilan gazta bat duela, Aritz Ganboa artzaina erronka batean murgilduko da eta Nafarroako mendiak korrika zeharkatuko ditu bere arbasoen herriak lotzeko: Arruazu, Sakana, eta Izaba, Erronkarin. Artzaintzan oinarritutako istorioaren ildo nagusia erronka izanik, bide horretan hainbat lekukotasun bilduko dira, landa-mundua eta -kultura balioesten eta aldarrikatzen dutenak eta, aldi berean, hiri-munduaren eta bizirik dagoen landa-munduaren arteko zubiak eraikitzen dituztenak. Dokumental hau kostu txikiko ekoizpena da, artzainaren beraren ideia apal batetik sortu zen eta pertsona askoren inplikazioari eta lan kolektiboari esker gauzatu ahal izan da.